اسلام آباد میں وفاقی تعلیمی اداروں میں چوری کی وارداتیں بڑھ گئیں

اسلام آباد (نیوز ڈیسک): وفاقی سرکاری تعلیمی اداروں میں چوری کی وارداتوں میں اضافہ ہوگیا ہے، اسلام آباد ماڈل کالج فار بوائز گولڑہ (10-6) میں کمپیوٹر لیب کا قیمتی سامان چوری ہونے کا انکشاف ہوا۔

ایکسپریس نیوز کے مطابق کالج انتظامیہ نے واقعے کی تحقیقات، مقدمے کے اندراج اور چوری شدہ سامان کی برآمدگی کے لیے پولیس سے رجوع کر لیا، وفاقی نظامت تعلیمات میں ڈائریکٹر کی ذمہ داریاں نبھانے والے کالج کے پرنسپل انوار خان کی جانب سے پولیس کو دی گئی تحریری درخواست کے مطابق نامعلوم افراد نے کالج کی کمپیوٹر لیب سے کمپیوٹرز کے اہم پرزہ جات اور دیگر سامان چوری کر لیا۔

درخواست میں بتایا گیا ہے کہ چوری ہونے والے سامان میں 21 عدد 16 جی بی ریم، 21 عدد 500 جی بی ایس ایس ڈی ہارڈ ڈسکس، 21 عدد 2.10 گیگا ہرٹز پروسیسرز، 21 عدد بیٹریاں اور 21 عدد کنیکٹنگ کیبلز شامل ہیں۔کالج انتظامیہ کے مطابق چوری کے واقعے سے تعلیمی سرگرمیاں متاثر ہونے کا خدشہ ہے، کیونکہ کمپیوٹر لیب طلبہ کی عملی تربیت اور کمپیوٹر کی تعلیم کے لیے استعمال ہوتی۔