لیفٹیننٹ کرنل نثار احمد خان (ستارہ جرات)

لیفٹیننٹ کرنل نثار احمد خان ستمبر 1965ء کی جنگ میں پاک فوج کے مایہ ناز ٹینک یونٹ '25 کیولری' کے کمانڈنگ آفیسر تھے۔ 8 ستمبر کو جب بھارتی فوج نے چونڈہ اور پسرور پر اچانک ٹینکوں سے یلغار کی تو کرنل نثار کو دشمن کی پیش قدمی روکنے کا حکم ملا۔ کرنل نثار نے بغیر وقت ضائع کیے اپنے ٹینکوں کو پسرور کے گاؤں گڈگور، چاروا اور پھلورہ کے درمیانی گنے کے کھیتوں میں ایسی مہارت سے چھپایا کہ بھارتی ٹینک جال میں پھنس گئے۔

کرنل نثار نے 'فائر اینڈ موو' کی ایسی جارحانہ حکمتِ عملی اپنائی کہ بھارتی کمانڈر سمجھ بیٹھے کہ ان کے سامنے پاکستان کا پورا آرمرڈ ڈویژن موجود ہے۔ گڈگور کے مقام پر لڑی جانے والی یہ معرکہ آرائی عسکری تاریخ میں ایک مثال بن گئی۔ کرنل نثار کی بے خوف کمان کے تحت 25 کیولری نے دشمن کے بیسیوں ٹینک جلا کر راکھ کا ڈھیر بنا دیے اور پسرور کی طرف دشمن کی پیش قدمی کا خواب ہمیشہ کے لیے چکنا چور کر دیا۔ حکومتِ پاکستان نے ان کی اس تاریخی جرات پر انہیں 'ستارہ جرات' کا اعزاز بخشا۔