ٹک ٹاکر پتلو کی شادی میں بھگدڑ اور ہلاکت کا معاملہ پنجاب اسمبلی پہنچ گیا

لاہور (خصوصی نامہ نگار): لاہور : ٹک ٹاکرپتلوکی شادی میں بھگدڑ اورہلاکت کامعاملہ پنجاب اسمبلی پہنچ گیا، جہاں باقاعدہ توجہ دلاؤ نوٹس جمع کرایا گیا۔

تفصیلات کے مطابق ٹک ٹاکر عنصر محمود عرف مسٹر پتلو کی شادی کی تقریب میں مچنے والی بھگدڑ اور ہلاکت کا واقعہ پنجاب اسمبلی میں اٹھا دیا گیا۔

اپوزیشن رکن ندیم قریشی نے اس افسوسناک واقعے پر پنجاب اسمبلی میں باقاعدہ توجہ دلاؤ نوٹس جمع کرا دیا۔

31 اکتوبر کو ڈسکہ روڈ پر واقع فراز اسٹیڈیم میں ٹک ٹاکر مسٹر پتلو کی شادی کی تقریب منعقد ہوئی، توجہ دلاؤ نوٹس کے متن میں کہا گیا کہ تقریب میں انعامات کی تقسیم کے اعلان پر شدید ہجوم اور بدنظمی پیدا ہوئی، جس کے نتیجے میں بھگدڑ مچ گئی۔

بھگدڑ کے اس حادثے میں 1 شخص جاں بحق جبکہ 18 افراد زخمی ہوئے، جس کے بعد واقعے کا مقدمہ یکم نومبر 2026ء کو سیالکوٹ کے تھانہ موترہ میں درج کیا گیا۔

توجہ دلاؤ نوٹس میں سوالات اٹھائے گئے کہ کیا اس قسم کی بڑی تقریب کے لیے مقامی انتظامیہ سے باقاعدہ اجازت حاصل کی گئی تھی؟ اگر انتظامیہ سے اجازت لی گئی تھی تو سیکیورٹی اور ایس او پیز کی کیا تفصیلات طے کی گئی تھیں؟ اور سیالکوٹ ڈسکہ روڈ حادثے میں ملوث اب تک کتنے ملزمان کو گرفتار کیا جا چکا۔

اپوزیشن رکن نے مطالبہ کیا پولیس کی جانب سے اب تک کی جانے والی تفصیلی تفتیش اور کارروائی سے ایوان کو آگاہ کیا جائے۔