سنار کے گھر سے لوٹا گیا 7 کروڑ روپے مالیت کا 2 کلو سے زائد سونا کھیتوں سے برآمد

سیالکوٹ (بیورو رپورٹ): سیالکوٹ: سمبڑیال پولیس نے سنار کے گھر سے لوٹا گیا 7 کروڑ روپے مالیت کا 2 کلو سے زائد سونا کھیتوں سے برآمد کرلیا۔

تفصیلات کے مطابق سیالکوٹ میں سمبڑیال پولیس نے فوری اور مؤثر کارروائی کرتے ہوئے ڈکیتی کی بڑی واردات ناکام بنا دی اور سنار کے گھر سے لوٹا گیا 7 کروڑ روپے مالیت کا 2 کلو سے زائد سونا برآمد کر لیا۔

پولیس حکام نے بتایا کہ سمبڑیال میں علی الصبح 2 مسلح ملزمان سیڑھی لگا کر ایک مقامی سنار کے گھر میں داخل ہوئے، ملزمان نے گھر میں موجود ملازم کو اسلحے کے زور پر یرغمال بنایا اور سیف سے 2 کلو سے زائد سونا لوٹ کر فرار ہو گئے۔

ون فائیو پر واقعے کی اطلاع ملتے ہی ڈی پی او سیالکوٹ نے فوری نوٹس لیتے ہوئے پولیس کو الرٹ کیا ، جس کے بعد سمبڑیال پولیس نے فوری طور پر علاقے کو گھیرے میں لے کر تعاقب شروع کیا۔

پولیس کی جانب سے ناکہ بندی اور گھیراؤ دیکھنے پر ملزمان گرفتاری کے خوف سے لوٹا ہوا سونا قریب واقع کھیت میں پھینک کر فرار ہو گئے۔

پولیس نے علاقے میں بڑے پیمانے پر سرچ آپریشن کے دوران کھیت سے تمام مسروقہ سونا (مالیت تقریباً 7 کروڑ روپے) برآمد کر لیا۔

حکام کا کہنا تھا کہ واقعے میں ملوث مفرور ملزمان کی گرفتاری کے لیے خصوصی ٹیمیں تشکیل دے دی گئی ہیں اور مختلف مقامات پر چھاپے مارے جا رہے ہیں، ملزمان کو جلد گرفتار کر کے قانون کے کٹہرے میں لایا جائے۔