لاہور دنیا کے آلودہ ترین شہروں کی فہرست میں دوسرے نمبر پر آگیا

لاہور (خصوصی نامہ نگار): لاہور(7 نومبر 2026): لاہور میں اسموگ کے باعث فضا انتہائی آلودہ ہو چکی ہے اور ایئر کوالٹی انڈیکس 273 ریکارڈ کیا گیا۔

لاہور دنیا کے آلودہ ترین شہروں کی فہرست میں دوسرے نمبر پر آ گیا ہے۔ شہر میں اسموگ کے باعث فضا انتہائی آلودہ ہو چکی ہے اور ایئر کوالٹی انڈیکس 273 ریکارڈ کیا گیا ہے، جبکہ ہوا کی رفتار 5 کلومیٹر فی گھنٹہ اور سمت شمال مغربی۔

فضائی آلودگی کے پیش نظر وزیراعلیٰ پنجاب کی ہدایت پر اسموگ گنز کا آپریشن اور سڑکوں پر پانی کا چھڑکاؤ مسلسل جاری ہے۔ مریم نواز کی ہدایت پر گزشتہ 24 گھنٹوں کے دوران پنجاب بھر میں ماحولیاتی قوانین کی خلاف ورزی کرنے والوں کے خلاف سخت کارروائیاں کی گئی ہیں اور فیلڈ انفورسمنٹ کے ذریعے مسلسل مانیٹرنگ کی جا رہی۔

لاہور میں ان کارروائیوں کے دوران صنعتی یونٹس، بھٹوں، پلاسٹک اور کمرشل کچن کی سخت نگرانی کی گئی، 258 صنعتی یونٹس کی انسپیکشن کی گئی، قوانین کی خلاف ورزی پر 5 یونٹس سیل کیے گئے اور 10 لاکھ 30 ہزار روپے جرمانہ عائد کیا گیا۔

452 بھٹوں کی جانچ پڑتال کی گئی، جن میں سے 3 بھٹے مسمار، 4 سیل اور 4 کے خلاف مقدمات درج کیے گئے جبکہ 7 لاکھ روپے جرمانہ عائد کیا گیا۔پلاسٹک کے خلاف کارروائی میں 153 مقامات چیک کیے گئے، 3 مقامات سیل کیے گئے، ایک ہزار 462 کلوگرام پلاسٹک ضبط کیا گیا اور 65 ہزار روپے جرمانہ عائد کیا گیا۔

صوبائی سینئر وزیر مریم اورنگزیب نے کسانوں سے اپیل کی ہے کہ وہ فصلوں کی باقیات کو آگ نہ لگائیں اور شہری اپنی گاڑیوں کی فٹنس کو یقینی بنائیں۔ انہوں نے خبردار کیا کہ گاڑی کا دھواں انسان اور ماحول دونوں کے لیے زہر ہے، اس لیے گاڑیوں کو فٹنس سرٹیفکیشن کے بعد ہی سڑک پر لایا جائے۔