کوٹ لکھپت کے قیدیوں کے لیے ریلیف کا مطالبہ

اسلام آباد (نیوز ڈیسک): جہلم: فواد چوہدری نے حکومت سے کوٹ لکھپت کے قیدیوں کے لیے ریلیف اور مذاکرات میں اصل قیادت کو شامل کیے جانے کا مطالبہ کیا۔

سابق وفاقی وزیر فواد چوہدری نے کہا ہے کہ کوٹ لکھپت جیل میں قید پاکستان تحریک انصاف (پی ٹی آئی) کے رہنماؤں کو ریلیف ملنا چاہیے، تاہم حکومت اس کے لیے تیار نہیں۔ جب کہ شاہ محمود قریشی، اعجاز چوہدری، عمر سرفراز چیمہ اور دیگر رہنماؤں کو بھی مذاکراتی عمل میں شامل کیا جانا چاہیے۔

جہلم میں گفتگو کرتے ہوئے فواد چوہدری نے کہا کہ پی ٹی آئی میں موجود اجنبی لوگ مذاکرات کر رہے ہیں، جب کہ مذاکراتی عمل میں شامل افراد کا تحریک انصاف سے کوئی تعلق نہیں۔ ایسی صورت حال میں پارٹی کی موجودہ قیادت قصور وار ہے۔ ان کا کہنا تھا کہ حکومت ایسی کارروائیاں کر رہی ہے جن سے مذاکرات آگے نہ بڑھ سکیں۔

فواد چوہدری نے کہا کہ تحریک انصاف میں وکلا کو اس امید پر شامل کیا گیا تھا کہ عدالتوں سے انصاف ملے گا، لیکن وہ چھبیسویں اور ستائیسویں آئینی ترامیم کو روکنے میں کامیاب نہیں ہو سکے۔ اب عدالتوں سے ریلیف کی امید بھی نہیں، جب کہ دوسری طرف موجودہ لوگ سیاسی جدوجہد بھی نہیں کر سکتے۔

انھوں نے کہا کہ تحریک انصاف کو وقت کے ساتھ اپنی حکمت عملی تبدیل کرنا ہوگی۔ جب تک پارٹی موجودہ قیادت کو الگ نہیں کرتی، وہ کامیاب نہیں ہو سکتی۔

فواد چوہدری نے نئے صوبوں کے قیام کی حمایت کرتے ہوئے کہا کہ بانی پی ٹی آئی بھی نئے صوبوں کے حامی ہیں اور ملک میں نئے صوبے بننے چاہییں۔ حکومت اور اسٹیبلشمنٹ کو نئے صوبوں کے معاملے پر تحریک انصاف کی حمایت حاصل کرنی چاہیے۔