پنجاب حکومت کا سرکاری پروٹوکول کے غیر مجاز استعمال پر پابندی کا اعلان

لاہور (خصوصی نامہ نگار): لاہور(23 اکتوبر 2026): حکومتِ پنجاب نے سرکاری افسران اور نجی افراد کی جانب سے غیر قانونی سرکاری پروٹوکول، مستقل پولیس اسکواٹس اور گاڑیوں پر سرکاری جھنڈوں کے غیر مجاز استعمال کے خلاف فوری کریک ڈاؤن کا حکم دے دیا۔

جمعہ کے روز سوشل میڈیا پلیٹ فارم ایکس پر جاری کردہ بیان میں صوبائی حکومت نے بتایا کہ وزیر اعلیٰ پنجاب مریم نواز شریف نے متعلقہ حکام کو ہدایت کی ہے کہ بغیر منظوری کے سرکاری پروٹوکول استعمال کرنے والوں کے خلاف فوری اور سخت قانونی کارروائی عمل میں لائی جائے۔

وزیراعلیٰ ہاؤس کی جانب سے "وزیراعلیٰ کی ترجیحی ہدایات کے عنوان سے ایک باضابطہ نوٹیفکیشن جاری کیا گیا ہے، جس میں تمام متعلقہ محکموں کو ان احکامات پر سختی سے عمل درآمد یقینی بنانے کا حکم دیا گیا۔

جاری کردہ ہدایات کے تحت صوبائی کابینہ کے اراکین، مشیروں، وزیراعلیٰ کے معاونینِ خصوصی، پارلیمانی سیکریٹریز، قائمہ کمیٹیوں کے چیئرمینوں، صوبائی اسمبلی کے اراکین، سرکاری افسران یا نجی افراد کو مناسب اجازت کے بغیر مستقل طور پر پولیس اسکواٹس فراہم نہیں کیے جائیں۔

وزیرِاعلیٰ پنجاب مریم نواز شریف کی ہدایت پر سرکاری پروٹوکول کے غیر مجاز استعمال کے خلاف اہم اقدام۔ کابینہ اراکین، مشیروں، معاونینِ خصوصی اور دیگر افراد کے لیے بلااجازت مستقل پولیس اسکواڈ کی تعیناتی پر پابندی عائد۔ سرکاری گاڑیوں پر بغیر اجازت فلیگ اسٹاف یا سرکاری پرچم کے استعمال کی ممانعت پر فوری عملدرآمد یقینی بنانے کی ہدایت۔

— Government of Punjab (@GovtofPunjabPK) October 22, 2026۔