پاکستان کی معدنی دولت، معاشی انقلاب کا نیا راستہ؟

اپنا پسرور (مانیٹرنگ ڈیسک): پاکستان کی معیشت ایک طویل عرصے سے قرضوں، تجارتی خسارے، محدود برآمدات اور بیرونی مالی معاونت کے چیلنجوں سے دوچار ہے۔ ہم کبھی آئی ایم ایف کے دروازے پر دستک دیتے ہیں، کبھی دوست ممالک سے مالی تعاون کی امید لگاتے ہیں اور کبھی بیرونی سرمایہ کاری کونجات کا ذریعہ قرار دیتے ہیں لیکن ایک بنیادی سوال ہمیشہ نظرانداز ہوتا رہا ہے کہ کیا ہم نے اپنے ملک کے قدرتی وسائل کو پوری طرح دریافت کرنے اور فایدہ اٹھانے کی کوشش کی۔

حقیقت یہ ہے کہ پاکستان کی سرزمین قدرتی معدنی دولت سے مالا مال ہے۔ جسے اگر دانش مندی سے استعمال کیا جائے تو پاکستان کی معاشی تقدیر بدل سکتی ہے۔ اسی تناظر میں اسلام آباد میں 12 اور 13 نومبر کو منعقد ہونے والا پاکستان منرلز انویسٹمنٹ فورم 2026 ایک اہم پیشرفت۔

اس بین الاقوامی کانفرنس میں ساٹھ سے زائد ممالک کے نمائندوں، عالمی سرمایہ کاروں، معدنیات کے ماہرین اور بڑی بین الاقوامی کمپنیوں نے شرکت کی۔ کانفرنس کے دوران تیرہ معاہدوں اور مفاہمتی یادداشتوں پر دستخط ہوئے۔ اس موقع پر حکومت پاکستان نے عالمی سرمایہ کاروں کو ملک کے معدنی وسائل میں سرمایہ کاری کی دعوت دی اور معدنی شعبے کو قومی معیشت کی ترقی کا اہم ذریعہ قرار دیا۔

بلوچستان کا صوبہ سونے، تانبے، لوہے، کرومائٹ، کوئلے اور دیگر قیمتی معدنیات کے حوالے سے غیر معمولی اہمیت رکھتا ہے۔ضلع چاغی میں ریکوڈک کا منصوبہ دنیا کے نمایاں تانبے اور سونے کے منصوبوں میں شمار ہوتا۔

یہ منصوبہ صرف بلوچستان یا پاکستان ہی نہیں بلکہ عالمی معدنی صنعت کے لیے بھی اہمیت رکھتا ہے۔حالیہ کانفرنس میں فرنٹیئر ورکس آرگنائزیشن کی جانب سے چاغی کے علاقے دشتِ کین میں تقریباً 35 کروڑ ٹن تانبے کی ممکنہ موجودگی کا تخمینہ سامنے آیا۔ یہ تخمینہ اب تک تجزیہ کیے گئے ڈرلنگ ڈیٹا کے تقریباً نصف پر مبنی ہے، اس لیے اسے حتمی ثابت شدہ ذخیرہ قرار دینے کے بجائے ایک اہم ابتدائی ارضیاتی امکان سمجھنا چاہیے۔

نیشنل ریسورسز لمیٹڈ نے بھی چاغی میں تانبے اور سونے کی معدنی موجودگی کے حوالے سے اپنی دریافتوں اور تقریباً دس کروڑ ڈالر کی سرمایہ کاری کے عزم کا اعلان کیا۔یہ اعلانات یقیناً حوصلہ افزا ہیں لیکن ہمیں یہ بھی سمجھنا ہوگا کہ معدنی وسائل کی موجودگی اور ان سے تجارتی پیمانے پر پیداوار حاصل کرنے کے درمیان طویل فاصلہ ہوتا۔

اس کے لیے جدید ٹیکنالوجی، بھاری سرمایہ، بنیادی ڈھانچے، ماہر افرادی قوت اور مستقل پالیسیوں کی ضرورت ہوتی۔

پاکستان کی معدنی دولت صرف بلوچستان تک محدود نہیں۔ پاکستان کے دوسرے صوبے اور علاقے بھی قدرتی وسائل سے مالا مال ہیں۔ سندھ میں تھر کے کوئلے کے ذخائر پاکستان کی توانائی کی ضروریات پوری کرنے میں اہم کردار ادا کر سکتے ہیں۔