خیبرپختونخوا میں امن و ترقی کیلیے 160 ارب روپے جلد جاری کرنے کا فیصلہ

اسلام آباد (نیوز ڈیسک): حکومت نے خیبرپختونخوا میں قیام امن اور تعمیر و ترقی کیلئے 160 ارب جلد جاری کرنے کا فیصلہ کر لیا۔ وفاقی اپیکس کمیٹی کےاجلاس میں خیبرپختونخوا کو 160 ارب روپے دینے کا اعلان کیا گیا تھا۔

وزیرپارلیمانی امور ڈاکٹر طارق فضل چوہدری نے اسلام آباد میں سینئر صحافیوں سے گفتگو میں کہا کہ اپیکس کمیٹی نے قیام امن اور تعمیروترقی کیلئے 160 روپے کا تخمینہ لگایا تھا یہ رقم خیبرپختونخوا کے حوالے کر دی جائے۔

طارق فضل چوہدری کے مطابق رقم این ایف سی ایوارڈ کی رقم کے علاوہ ہے اور یہ رقم خیبرپختونخوا میں 3شعبوں میں خرچ کی جائے۔

ان کا کہنا تھا کہ کےپی میں پولیس سمیت سویلین اداروں کی صلاحیت بہتر بنائیں گے، کےپی میں صحت، تعلیم، سینی ٹیشن کی صورتحال کو بہتر بنایا جائے گا، پی ٹی آئی کے 12 سالہ دور کے نامکمل ترقیاتی منصوبےمکمل کیے جائیں گے، کے پی کے160 ارب میں سے نصف سے زائد رقم متاثرہ اضلاع پر خرچ ہو۔

طارق فضل نے دعویٰ کیا کہ 3 سے 6 ماہ میں خیبرپختونخوا کے 12 اضلاع سے دہشتگردی کا خاتمہ کریں گے ان اضلاع کو دہشت گردوں سےمکمل طور پر کلیئر کروایا جائے گا، دہشت گردی کیخلاف تمام آپریشنز انٹیلی جنس بیسڈ ہوں گے تاہم مقامی آبادی کی نقل مکانی ان آپریشنز کا حصہ نہیں ہوگی، دہشتگردی کے خاتمے کےبعدنظم و نسق سول انتظامیہ کےسپرد کیا جائے۔