محکمہ صحت پنجاب کی شہریوں کو پُرہجوم اجتماعات میں جانے سے گریز کی ہدایت

پنجاب میں کورونا کیسز میں واضح کمی ہوگئی ہے، گزشتہ24 گھنٹوں میں صرف162 کیسز رپورٹ ہوئے، لوگ بلاضرورت گھرسے باہر نہ نکلیں، 12 سال سے زائد عمرشہری کورونا ویکسین فوری لگوائیں۔ سیکرٹری محکمہ صحت پنجاب

لاہور: محکمہ صحت پنجاب نے شہریوں کو پُرہجوم اجتمامات میں جانے سے گریز کی ہدایت کردی، سیکرٹری محکمہ پرائمری اینڈ سیکنڈری ہیلتھ کیئرپنجاب عمران سکندر بلوچ نے کہا کہ پنجاب میں کورونا کیسز میں واضح کمی ہوگئی ہے، کورونا کا پھیلاؤ روکنے کیلئے لوگ بلاضرورت گھرسے باہر نہ نکلیں، 12 سال سے زائد عمرشہری کورونا ویکسین فوری لگوائیں۔

تفصیلات کے مطابق صوبائی سیکرٹری محکمہ پرائمری اینڈسیکنڈری ہیلتھ کیئرعمران سکندر بلوچ کا کہنا ہے کہ محکمہ صحت کے مؤثراقدامات کے باعث پنجاب میں کورونا وائرس کے کیسز میں واضح کمی ہوگئی ہے۔ کورونا کیسز میں مزیدکمی لانے کیلئے مختلف سیکٹرز کیلئے اسپیشل ایس او پیز جاری کر دیئے گئے ہیں - عمران سکندر بلوچ نے کہاکہ تمام شہری خاص طور پر کورونا کی مکمل احتیاط کو یقینی بنائیں۔

صرف ویکسی نیشن ہی کورونا وائرس کے خلاف واحد اور مؤثر حل ہے- 12 سال سے زائد عمر کے تمام افراد کو ویکسین لگانے کی پوری کوشش کررہے ہیں۔ گذشتہ 24 گھنٹوں کے دوران صوبہ بھر سے کورونا کے 162 نئے کیسز سامنے آئے ہیں۔ صوبائی سیکرٹری صحت نے کہاکہ صوبہ بھر میں کورونا کے کیسز کی کل تعداد 438447 ہوگئی ہے۔ اب تک صوبہ بھر میں 417,148 مریض علاج کے بعد مکمل صحت یاب ہو کراپنے گھروں کوواپس جاچکے ہیں۔

انہوں نے کہاکہ صوبہ بھر میں کورونا کے ایکٹو کیسز کی کل تعداد 8426 ہو گئی ہے۔ گذشتہ چوبیس گھنٹوں کے دوران لاہور میں کورونا وائرس سے 1 موت رپورٹ ہوئی ہے۔ گذشتہ چوبیس گھنٹوں کے دوران صوبہ بھر میں کورونا کے باعث 8 افراداپنی جان کی بازی ہارچکے ہیں۔ صوبہ بھر میں کوروناکے باعث اموات کی کل تعداد 12873 ہو چکی ہے۔ گذشتہ 24 گھنٹوں کے دوران کورونا کے 15002 تشخیصی ٹیسٹ کئے گئے ہیں۔

صوبہ بھر میں کورونا کیاب تک مجموعی طور پر 7,766,678 تشخیصی ٹیسٹ کئے جا چکے ہیں۔ عمران سکندر بلوچ نے کہاکہ گذشتہ 24 گھنٹوں کے دوران لاہور میں کوروناکے 94 جبکہ ملتان میں 16 کیسز رپورٹ ہوئے ہیں۔ راولپنڈی میں کوروناکے 10، فیصل آباد اور سرگودھا میں 6 کیسز رپورٹ ہوئے ہیں۔ ڈیرہ غازی خان میں 5 جبکہ سیالکوٹ، اوکاڑہ میں 3 کیسز رپورٹ ہوئے ہیں۔ گذشتہ چوبیس گھنٹوں کے دوران صوبہ بھر کے تمام شہروں میں کورونا کے مثبت کیسزکی مجموعی شرح 1.1 فیصد ریکارڈ کی گئی ہے۔

لاہور میں مثبت کیسزکی شرح 2.0 فیصد ریکارڈ کی گئی ہے۔ راولپنڈی میں کورونا وائرس کی 1.1 اور فیصل آباد میں 0.9 فیصد مثبت شرح ریکارڈ کی گئی ہے۔ ملتان میں کوروناوائرس کی 2.2 اور گوجرانوالہ میں0.1 فیصد مثبت شرح ریکارڈ کی گئی ہے۔ صوبائی سیکرٹری محکمہ پرائمری اینڈ سکینڈری ہیلتھ کیئرنے مزید کہا کہ شہری کورونا کے خلاف خصوصی حفاظتی تدابیر اختیار کرکے خود کو محفوظ بنائیں۔

بلاضرورت گھر سے باہر نکلنے اور پر ہجوم اجتماعات میں جانے سے مکمل گریز کریں - سماجی فاصلے اور ماسک کے استعمال کوہرصورت یقینی بنائیں۔ 12 سال سے زائد عمر کے تمام شہری کورونا وائرس سے بچاؤ کی ویکسین لازمی اور فوری لگوائیں۔ تمام ویکسی نیشن مراکز پر ویکسین وافر مقدار میں موجود ہے۔ عوام کسی بھی قسم کی رہنمائی یا شکایات کے لئے1033 پر رابطہ کرسکتے ہیں۔