شہری پر تشدد، پنجاب پولیس کا سب انسپکٹر گرفتار

لاہور (خصوصی نامہ نگار): وزیراعلیٰ پنجاب مریم نواز شریف نے کہا ہے کہ ہوٹل میں چیکنگ کے دوران شہری کو تھپڑ مارنے والے سب انسپکٹر اویس ارشد کے خلاف فوری اور سخت قانونی و محکمانہ کارروائی عمل میں لائی گئی ہے۔

سوشل میڈیا پر جاری تفصیلی بیان میں وزیراعلیٰ پنجاب مریم نواز شریف نے ملزم کی تصویر شیئر کرتے ہوئے واضح کیا کہ سب انسپکٹر اویس ارشد پر ہوٹل میں تصدیقی چیکنگ کے عمل کے دوران ایک معزز شہری کو تھپڑ مارنے کا الزام ثابت ہوا، جس پر بلا تاخیر کارروائی کی گئی ہے۔

انہوں نے بتایا کہ شہری پر تشدد کے الزام میں سب انسپکٹر اویس ارشد کے خلاف فوجداری دفعات کے تحت مقدمہ درج کر کے پولیس نے اسے باقاعدہ گرفتار کر لیا ہے، جبکہ افسر کو فوری طور پر پولیس سروس سے معطل کر دیا گیا ہے۔

وزیراعلیٰ پنجاب نے مزید لکھا کہ اختیارات کے ناجائز استعمال کی روک تھام اور قانون کی بالادستی کے لیے سخت ترین احتساب یقینی بنایا جا رہا ہے تاکہ شہریوں کی عزت، وقار اور بنیادی حقوق کا تحفظ ہر صورت برقرار رہے۔