شانزے سیال اور چھلڑے چھلڑے وال: ’دوست کہتے تھے کہ سرائیکی کانٹینٹ تبدیل کرو، لیکن مجھے یہی کرنا تھا‘

’چھلڑے چھلڑے وال‘ اُن کا ایک ساتھی گلوکار محسن لاشاری کے ساتھ گایا ہوا ’کور‘ سانگ ہے جسے انسٹا گرام پر اپلوڈ ہونے کے بعد سے اب تک ایک کروڑ سے زیادہ بار دیکھا جا چکا ہے۔

اس گانے کے ساتھ ہزاروں ریلز بنائی جا چکی ہیں اور انڈیا اور پاکستان میں موسیقی کی کئی نامور شخصیات سمیت لاکھوں صارفین نے اسے شیئر کیا ہے جبکہ اس گانے کے لاتعداد ری میک بھی بن چکے ہیں۔

’چھلڑے چھلڑے وال‘ کوئی نیا گانا نہیں ہے اور اسے ماضی میں متعدد گلوکار گا چکے ہیں، جن میں پاکستان کے صوبہ پنجاب کے شہر میانوالی میں پیدا ہونے والے شفا اللہ خان روکھڑی بھی شامل ہیں۔

بی بی سی کو دیے گئے ایک انٹرویو میں شانزے نے بتایا کہ انھیں گانے کا شوق بچپن سے تھا اور اُنھیں اکثر بتایا جاتا تھا کہ اُن کی آواز منفرد ہے۔

شانزے کے بقول انھیں نے اسے شوق کی حد تک ہی رکھا، بلکہ یونیورسٹی آنے کے بعد تو اُن کا گانے سے تعلق کم ہی رہا۔

’میں ایک حد تک مایوس ہی تھی کیونکہ مجھے کہا جاتا تھا کہ تمھاری آواز اچھی ہے لیکن تمھیں ٹیمپو کا علم نہیں، تم ٹیمپو اور ساز کے ساتھ نہیں گا سکتیں۔‘

محسن لاشاری مختلف شوقیہ گلوکاروں کے ساتھ مل کر ’کولیب‘ یا مشترکہ ویڈیوز بناتے رہتے ہیں۔ اور اس رابطے کے بعد اِن دونوں نے مل کر یہی سرائیکی گانا گایا جسے ابتدائی دنوں میں اچھے ویوز ملے۔