پسرور کی سڑکیں یا موت کے راستے؟ آخر کب تک قیمتی جانیں ضائع ہوتی رہیں گی

دو رویہ سڑکوں کی تعمیر وقت کی اہم ضرورت، محکمہ ہائی وے کی دستیاب زمین کو استعمال میں لایا جائے۔

پسرور اور اس کے گردونواح میں آئے روز ہونے والے ٹریفک حادثات نے شہریوں کو شدید تشویش میں مبتلا کر دیا ہے۔ گزشتہ صرف دس روز کے دوران تقریباً 20 کے قریب خوفناک ٹریفک حادثات پیش آنے کی اطلاعات ہیں، جن میں ماں بیٹے سمیت چار افراد زندگی کی بازی ہار گئے، جبکہ تقریباً 20 افراد شدید زخمی ہوئے۔ ریسکیو 1122 کے اہلکاروں نے زخمیوں کو ابتدائی طبی امداد فراہم کرنے کے بعد مختلف ہسپتالوں میں منتقل کیا۔

یہ اعدادوشمار محض خبریں نہیں بلکہ کئی گھروں کے اجڑنے، ماؤں کی گودیں ویران ہونے اور خاندانوں کے مستقبل تاریک ہونے کی داستان ہیں۔ ہر حادثے کے بعد چند روز تک افسوس اور تشویش کا اظہار کیا جاتا ہے، انتظامیہ سے نوٹس لینے کے مطالبات ہوتے ہیں، لیکن پھر زندگی معمول پر آ جاتی ہے اور سڑکوں پر موت کا یہ کھیل دوبارہ شروع ہو جاتا ہے۔

سوال یہ ہے کہ آخر اس مسئلے کا مستقل حل کیا ہے؟

میری نظر میں پسرور اور اس کے گردونواح میں بڑھتے ہوئے ٹریفک حادثات کی روک تھام کے لیے سب سے اہم اور دیرپا اقدام اہم شاہراہوں کو دو رویہ (Dual Carriageway) بنانا ہے۔

اس وقت پسرور کے گردونواح کی بیشتر سڑکیں سنگل کیرج وے ہیں، جہاں آنے اور جانے والی دونوں اطراف کی ٹریفک ایک ہی سڑک استعمال کرتی ہے۔ نتیجتاً جب کوئی گاڑی تیز رفتاری سے اوورٹیک کرنے کی کوشش کرتی ہے تو سامنے سے آنے والی گاڑی کے ساتھ تصادم کا خطرہ پیدا ہو جاتا ہے۔ بالخصوص رات کے اوقات، دھند، کم روشنی اور زیادہ ٹریفک کے دوران یہ خطرہ کئی گنا بڑھ جاتا ہے۔

سب سے اہم بات یہ ہے کہ ان شاہراہوں کے اطراف محکمہ ہائی وے کی کافی سرکاری جگہ موجود ہونے کی نشاندہی کی جاتی ہے۔ اگر اس زمین کی باقاعدہ پیمائش اور ملکیت کی تصدیق کر لی جائے تو ممکن ہے کہ سڑکوں کی توسیع اور دوسری رویہ سڑک کی تعمیر کے لیے اسے استعمال کیا جا سکے۔

جب سڑکوں کے اطراف جگہ دستیاب ہو تو متعلقہ محکموں کو چاہیے کہ وہ اس امکان کا سنجیدگی سے جائزہ لیں۔ آخر کیوں پسرور کے شہریوں کو محفوظ سفر کی سہولت فراہم کرنے کے لیے کوئی جامع منصوبہ بندی نہیں کی جا رہی؟

یہ حقیقت ہے کہ دو رویہ سڑک کی تعمیر کے لیے بھاری فنڈز، تکنیکی منصوبہ بندی اور حکومتی وسائل درکار ہوتے ہیں، لیکن انسانی جانوں کی قیمت ان اخراجات سے کہیں زیادہ ہے۔ سڑکوں کی تعمیر کو محض ترقیاتی منصوبہ نہیں بلکہ عوام کی زندگیوں کے تحفظ کا منصوبہ سمجھا جانا چاہیے۔

میری ضلعی انتظامیہ، محکمہ ہائی وے، نیشنل ہائی وے سے متعلقہ حکام اور پسرور کے منتخب عوامی نمائندوں سے گزارش ہے کہ وہ اس مسئلے کو ترجیحی بنیادوں پر اٹھائیں اور درج ذیل اقدامات یقینی بنائیں:

1. پسرور اور گردونواح کی تمام اہم شاہراہوں کا سروے کروا کر دو رویہ سڑکوں کی تعمیر کے لیے قابلِ عمل منصوبہ تیار کیا جائے۔

2. محکمہ ہائی وے کی دستیاب سرکاری زمین کی پیمائش کروا کر اسے عوامی مفاد میں استعمال کرنے کے امکانات کا جائزہ لیا جائے۔

3. پسرور سے سیالکوٹ، نارووال، ظفروال اور دیگر ملحقہ علاقوں کو ملانے والی اہم شاہراہوں کی ٹریفک اور حادثات کی شرح کے مطابق ترجیحی بنیادوں پر بہتری کی جائے۔

4. جب تک دو رویہ سڑکیں تعمیر نہیں ہوتیں، اس وقت تک موجودہ سڑکوں پر رفتار کی حد مقرر کرنے، خطرناک موڑوں پر وارننگ سائن لگانے اور ٹریفک قوانین پر سختی سے عمل درآمد کروانے کے اقدامات کیے جائیں۔

5. اوورلوڈنگ، تیز رفتاری اور غلط اوورٹیکنگ کے خلاف بلاامتیاز کارروائی کی جائے۔

6. آبادی والے علاقوں میں محفوظ پیدل گزرگاہیں، مناسب اسٹریٹ لائٹس اور ضرورت کے مطابق اسپیڈ کنٹرول کے انتظامات کیے جائیں۔

یہ بھی ضروری ہے کہ اس منصوبے کو ایک ہی وقت میں مکمل کرنے کے بجائے مرحلہ وار شروع کیا جائے۔ سب سے زیادہ حادثات والے مقامات اور مصروف شاہراہوں کو پہلے ترجیح دی جائے تاکہ محدود وسائل کے باوجود عملی کام کا آغاز ہو سکے۔

آخر میں ایک اہم سوال اپنے منتخب نمائندوں سے بھی ہے:

کیا پسرور کے عوام صرف ووٹ دینے کے لیے ہیں یا انہیں محفوظ سڑکوں پر سفر کرنے کا حق بھی حاصل ہے؟ کیا ہر حادثے کے بعد صرف تعزیتی بیانات ہی ہمارا مقدر رہیں گے یا کوئی ایسا عملی قدم بھی اٹھایا جائے گا جس سے مستقبل میں انسانی جانیں بچائی جا سکیں؟

ہم کسی پر الزام تراشی نہیں کرنا چاہتے، ہمارا مقصد صرف یہ ہے کہ مزید قیمتی جانیں ضائع ہونے سے بچائی جائیں۔ آج اگر اس مسئلے کو سنجیدگی سے حل نہ کیا گیا تو کل کسی اور گھر کا چراغ بجھ سکتا ہے۔

یاد رکھیے! سڑکیں صرف گاڑیوں کی آمدورفت کے لیے نہیں بلکہ ان پر سفر کرنے والے انسانوں کی حفاظت کے لیے بھی بنائی جاتی ہیں۔

پسرور کو دو رویہ سڑکیں چاہییں، محفوظ سفر چاہیے، اپنے بچوں، ماؤں، بہنوں اور بھائیوں کی زندگیوں کا تحفظ چاہیے۔

خدارا! حادثات کے بعد افسوس کرنے کے بجائے حادثات سے پہلے حفاظتی اقدامات کریں۔ کیونکہ ایک انسانی جان بچانا بھی بہت بڑی کامیابی ہے۔

پسرور کی سڑکوں کو محفوظ بنائیں، مزید جنازوں کا انتظار نہ کریں!