پاکستانی فوج نے ریٹائرڈ جنرل فیض حمید کو تحویل میں لیا: آئی ایس پی آر
پاکستانی فوج کے ترجمان نے اعلان کیا ہے کہ آئی ایس آئی کے سابق سربراہ، لیفٹیننٹ جنرل ریٹائرڈ فیض حمید کو فوجی تحویل میں لے لیا گیا ہے۔ پیر کو جاری ہونے والے آئی ایس پی آر کے بیان کے مطابق، سپریم کورٹ کے احکامات کی روشنی میں ایک تفصیلی کورٹ آف انکوائری منعقد کی گئی تھی تاکہ ٹاپ سٹی کیس میں لیفٹیننٹ جنرل فیض حمید (ریٹائرڈ) کے خلاف کی گئی شکایات کی درستگی کا پتہ لگایا جا سکے۔
اس انکوائری کے نتیجے میں، پاکستان آرمی ایکٹ کی دفعات کے تحت لیفٹیننٹ جنرل فیض حمید (ریٹائرڈ) کے خلاف مناسب تادیبی کارروائی کا آغاز کر دیا گیا ہے۔ اس کے علاوہ، ان کی ریٹائرمنٹ کے بعد پاکستان آرمی ایکٹ کی خلاف ورزی کے متعدد واقعات بھی سامنے آئے ہیں۔
آئی ایس پی آر کے بیان کے مطابق، فیلڈ جنرل کورٹ مارشل کا عمل شروع کر دیا گیا ہے اور لیفٹیننٹ جنرل فیض حمید (ریٹائرڈ) کو فوجی تحویل میں لے لیا گیا ہے۔